ನಟ ಹೊನ್ನವಳ್ಳಿ ಕೃಷ್ಣ ಇಂದು (ಮೇ 21) ಎಪ್ಪತ್ತೊಂದನೇ ಹುಟ್ಟುಹಬ್ಬ ಆಚರಿಸಿಕೊಳ್ಳುತ್ತಿದ್ದಾರೆ. ಅವರು ಸಿನಿಮಾರಂಗಕ್ಕೆ ಪರಿಚಯವಾಗಿದ್ದು ಸಹನಿರ್ದೇಶಕರಾಗಿ ಎನ್ನುವ ವಿಷಯ ಬಹಳಷ್ಟು ಜನರಿಗೆ ತಿಳಿದಿರಲಿಕ್ಕಿಲ್ಲ. 40ಕ್ಕೂ ಹೆಚ್ಚು ಚಿತ್ರಗಳಿಗೆ ಸಹನಿರ್ದೇಶಕರಾಗಿ ಕೆಲಸ ಮಾಡಿರುವ ಹೊನ್ನವಳ್ಳಿ ಆರು ಧಾರಾವಾಹಿಗಳನ್ನು ನಿರ್ದೇಶಿಸಿದ್ದಾರೆ.
ಹೊನ್ನವಳ್ಳಿಯ ಕೃಷ್ಣ ಅವರಿಗೆ ಚಿಕ್ಕಂದಿನಲ್ಲೇ ಸಿನಿಮಾ ವ್ಯಾಮೋಹ ಶುರುವಾಗಿತ್ತು. ತಿಂಗಳ ಬೆಳಕಿನಲ್ಲಿ ಅವರು ಸಿನಿಮಾ ಹಾಡು ಹೇಳುತ್ತಿದ್ದರೆ ಹಳ್ಳಿಯ ಮಕ್ಕಳು ಕುಣಿಯುತ್ತಿದ್ದರಂತೆ. ಊರಿನ ಹಿರಿಯರು ಸಿನಿಮಾ ಸೇರುವಂತೆ ತಮಾಷೆಗೆ ಹೇಳಿದ್ದರಷ್ಟೆ. ಇದರಿಂದ ಉತ್ತೇಜಿತರಾದ ಕೃಷ್ಣ ದುಡ್ಡು ಹೊಂದಿಸಿಕೊಂಡು ಮದರಾಸು ಸೇರಿದರು. ಅಲ್ಲಿ ರಾಜಕುಮಾರ್ ಕುಟುಂಬದ ಸಂಪರ್ಕ ಸಿಕ್ಕಿತು. ‘ಮಿಸ್ಟರ್‌ ರಾಜಕುಮಾರ್’ (1970) ಚಿತ್ರದ ಪುಟ್ಟ ಪಾತ್ರವೊಂದರ ಮೂಲಕ ಅವರು ಬೆಳ್ಳಿತೆರೆಗೆ ಪರಿಚಯವಾದರು. ಕೆಲಸದಲ್ಲಿನ ಶ್ರದ್ಧೆ, ಚುರುಕುತನ, ಉತ್ಸಾಹ
ಗಮನಿಸಿದ ನಿರ್ದೇಶಕ ಸಿದ್ದಲಿಂಗಯ್ಯನವರು ತಮ್ಮ `ನ್ಯಾಯವೇ ದೇವರು’ ಚಿತ್ರದಲ್ಲಿ ಅವರಿಗೆ ಸಹನಿರ್ದೇಶಕರಾಗಿ ಕೆಲಸ ನೀಡಿದರು. ಮುಂದೆ ಹೊನ್ನವಳ್ಳಿ ಕೃಷ್ಣ 40ಕ್ಕೂ ಹೆಚ್ಚು ಚಿತ್ರಗಳಿಗೆ ಸಹನಿರ್ದೇಶಕರಾಗಿ ಕೆಲಸ ಮಾಡಿದರು. ಇವುಗಳಲ್ಲಿ ಬಹುಪಾಲು ರಾಜಕುಮಾರ್ ಅಭಿನಯದ ಚಿತ್ರಗಳು ಎನ್ನುವುದು ವಿಶೇಷ. ಆದರೆ ಅವರಿಗೆ ಸಿನಿಮಾಗೆ ಸ್ವತಂತ್ರ ನಿರ್ದೇಶಕರಾಗಿ ಕೆಲಸ ಮಾಡುವ ಯೋಗ ಕೂಡಿಬರಲೇ ಇಲ್ಲ. ಹಿರಿತೆರೆಯಲ್ಲಿ ಸಾಧ್ಯವಾಗದಿದ್ದರೂ ಕಿರುತೆರೆಯಲ್ಲಿ ಅವರು ಆರು ಧಾರಾವಾಹಿಗಳನ್ನು ನಿರ್ದೇಶಿಸಿದ್ದಾರೆ. ಸವಿನೆನಪು, ಗೌಡ್ತಿ ಗೌರಮ್ಮ, ಗ್ರಾಮಸಿಂಹ, ನಮ್ಮೂರಲ್‌ ಒಂದ್‌ ನಾಟ್ಕ… ದೂರದರ್ಶನಕ್ಕೆ ಅವರು ನಿರ್ದೇಶಿಸಿದ ಧಾರಾವಾಹಿಗಳು. ನಿರ್ದೇಶನದಲ್ಲಿನ ಅನುಭವದ ಹಿನ್ನೆಲೆಯಲ್ಲಿ ಅವರು ‘ಹೊನ್ನವಳ್ಳಿ ಮಿತ್ರಮಂಡಳಿ’ ತಂಡ ಕಟ್ಟಿ ದಶಕಗಳ ಕಾಲ ನಡೆಸಲು ಸಾಧ್ಯವಾಯ್ತು.
