ಲೇಖಕ
ಕೋವೆಲಮುಡಿ ರಾಘವೇಂದ್ರರಾವ್… ತೆಲುಗು ಚಿತ್ರರಂಗದ ಜನಪ್ರಿಯ ಚಿತ್ರನಿರ್ದೇಶಕ. ಕನ್ನಡದ ‘ಶ್ರೀ ಮಂಜುನಾಥ’ ಅವರ ನಿರ್ದೇಶನದಲ್ಲಿ ತಯಾರಾದ ಸಿನಿಮಾ. 108 ಚಿತ್ರಗಳನ್ನು ನಿರ್ದೇಶಿಸಿರುವ ಕೆ.ರಾಘವೇಂದ್ರರಾವ್ ಇಂದು 79ನೇ ಹುಟ್ಟುಹಬ್ಬ ಆಚರಿಸಿಕೊಳ್ಳುತ್ತಿದ್ದಾರೆ.
ಕೋವೆಲಮುಡಿ ರಾಘವೇಂದ್ರರಾವ್… ತೆಲುಗು ಚಿತ್ರರಂಗದಲ್ಲಿ ಇವರ ಹೆಸರು ಹೇಳದಿದ್ದರೆ ಅಪೂರ್ಣವೆನಿಸುತ್ತದೆ. 23 ಮೇ 1942ರಲ್ಲಿ ಖ್ಯಾತ ನಿರ್ದೇಶಕ ಕೆ.ಎಸ್.ಪ್ರಕಾಶ್ ರಾವ್ ರವರ ಪುತ್ರನಾಗಿ ಜನಿಸಿದರು. ಮೊದಲಿನಿಂದಲೂ ಸಿನಿಮಾ ಪ್ರೀತಿ ಇಟ್ಟುಕೊಂಡಿದ್ದ ‘ಬಾಬು’ (1975) ಚಿತ್ರದೊಂದಿಗೆ ಸ್ವತಂತ್ರ ನಿರ್ದೇಶಕರಾದರು. ಇವರ ನಿರ್ದೇಶನದ ನೂರನೇ ಚಿತ್ರ ‘ಗಂಗೋತ್ರಿ’. ರಾಘವೇಂದ್ರರಾವ್ ನಿರ್ದೇಶನದ ಸೂಪರ್‌ಹಿಟ್‌ ತೆಲುಗು ಸಿನಿಮಾ ‘ಘರಾನಾ ಮೊಗುಡು’ ನಿರ್ಮಾಪಕರಿಗೆ 10 ಕೋಟಿ ಶೇರ್ ತಂದುಕೊಟ್ಟ ಮೊದಲ ತೆಲುಗು ಸಿನಿಮಾ. ರಾಜಕುಮಾರ್ ಅಭಿನಯದ ‘ಅನುರಾಗ ಅರಳಿತು’ ಕನ್ನಡ ಚಿತ್ರದ ಈ ತೆಲುಗು ರೀಮೇಕ್‌ನಲ್ಲಿ ಚಿರಂಜೀವಿ ಹೀರೋ.
ಅಲ್ಲಿಂದ ಇಲ್ಲಿಯವರೆಗೂ ಸುಮಾರು 108 ಚಿತ್ರಗಳನ್ನು ನಿರ್ದೇಶಿಸಿರುವುದು ದಾಖಲೆಯಾದರೆ, ಅವುಗಳಲ್ಲಿ ಸುಮಾರು 90 ಹಿಟ್ ಚಿತ್ರಗಳನ್ನು ನೀಡಿರುವುದು ಮತ್ತೊಂದು ದಾಖಲೆ. ತೆಲುಗು, ಕನ್ನಡ, ಹಿಂದಿ ಚಿತ್ರಗಳನ್ನೂ ನಿರ್ದೇಶಿಸಿದ್ದಾರೆ. ಅವರದ್ದೇ ಸ್ವಂತ ಬ್ಯಾನರ್ ಅರ್.ಕೆ. ಫಿಲಿಮ್ಸ್ ನಿರ್ಮಾಣ ಸಂಸ್ಥೆಯಲ್ಲಿ ತಮ್ಮನೊಡನೆ (ಚಿಕ್ಕಪ್ಪನ ಮಗ) ಅನೇಕ ಚಿತ್ರಗಳನ್ನು ನಿರ್ಮಿಸಿದ್ದಾರೆ. ಈಗ ತಮ್ಮ ಅಳಿಯನೊಡಗೂಡಿ ಶೋಭು ಯಾರ್ಲಗಡ್ಡ (ಬಾಹುಬಲಿ 1,2) ಪಾಲುದಾರ ನಿರ್ಮಾಪಕರಾಗಿದ್ದಾರೆ.
ಕನ್ನಡದಲ್ಲಿ ‘ಶ್ರೀ ಮಂಜುನಾಥ’ ಚಿತ್ರ ನಿರ್ದೇಶಿಸಿದ್ದಾರೆ. ತೆಲುಗಿನಲ್ಲಿ ಪ್ರಖ್ಯಾತ ನಟರೆಲ್ಲಾ ಇವರ ಚಿತ್ರದಲ್ಲಿ ನಟಿಸಲು ಹಾತೊರೆಯುತ್ತಿದ್ದರು. ಬಹಳಷ್ಟು ಒಳ್ಳೆಯ ಪ್ರತಿಭೆಗಳನ್ನು ಪರಿಚಯಿಸಿದ್ದರು. ವೆಂಕಟೇಶ್, ಅಲ್ಲೂ ಅರ್ಜುನ್ ರಂಥ ಘಟಾನುಘಟಿಗಳಿಗೆ ಅದ್ಭುತ ಓಪನಿಂಗ್ಸ್ ಕೊಟ್ಟ ನಿರ್ದೇಶಕ. ಮುಖ್ಯವಾಗಿ ಹಲವಾರು ನಾಯಕನಟಿಯರಿಗೆ ಚಿತ್ರರಂಗದಲ್ಲಿ ಭದ್ರ ನೆಲೆ ಕಂಡುಕೊಳ್ಳಲು ಕಾರಣರಾಗಿದ್ದಾರೆ. ತೆಲುಗು ಚಿತ್ರರಂಗದಲ್ಲಿ ಹಾಡುಗಳ ಮೇಕಿಂಗ್ ಎಂದರೆ ಹೀಗಿರಬೇಕು ಎಂದು ತೋರಿಸಿಕೊಟ್ಟವರು. ಇವರ ಹಲವಾರು ಚಿತ್ರಗಳು ಹಲವಾರು ಪ್ರತಿಷ್ಠಿತ ಪ್ರಶಸ್ತಿಗಳಿಗೆ ಭಾಜನವಾಗಿವೆ.
ಇವರ ಕೆಲವು ಸೂಪರ್ ಹಿಟ್ ಚಿತ್ರಗಳು – ಕೊಂಡವೀಟಿ ಸಿಂಹಂ, ವೇಟಗಾಡು, ಕಲಿಯುಗ ಪಾಂಡವುಲು, ಆಗ್ನಿ ಪರ್ವತಂ, ಬೊಬ್ಬಿಲಿ ಬ್ರಹ್ಮನ್ನ, ಅಲ್ಲುಡುಗಾರು, ಜಗದೇಕವೀರುಡು ಅತಿಲೋಕ ಸುಂದರಿ, ಘರಾನಾ ಮೊಗುಡು, ಅನ್ನಮಯ್ಯ, ಗಂಗೋತ್ರಿ, ಪೆಳ್ಳಿ ಸಂದಡಿ (ಈ ಚಿತ್ರದ ಕೋರಿಯೋಗ್ರಾಫರ್ ಕೂಡಾ ಇವರೇ) ಸ್ಟೂಡೆಂಟ್ ನಂಬರ್ 1…ಪಟ್ಟಿ ಹೇಳ್ತಾ ಹೋದರೆ ಬೆಳೆಯುತ್ತಾ ಹೋಗುತ್ತದೆ. ಇನ್ನು ಎಸ್.ಎಸ್.ರಾಜಮೌಳಿ ತಯಾರಾಗಿದ್ದು ಇವರ ಗರಡಿಯಲ್ಲೇ. 2015ರಿಂದ 2019 ರವರೆಗೂ ಟಿಟಿಡಿ ಟ್ರಸ್ಟ್ ನ ಸದಸ್ಯರಾಗಿ ನೇಮಕವಾಗಿದ್ದರು. ರಾಜಕೀಯದಿಂದ ದೂರವಿರುವ ರಾಘವೇಂದ್ರರಾವ್ ಸಿನಿಮಾವನ್ನೇ ಉಸಿರು ಎಂದು ಜೀವಿಸುತ್ತಿರುವ ತಂತ್ರಜ್ಞ. ಇಂದು (ಮೇ 23) 79ನೇ ಹುಟ್ಟುಹಬ್ಬ ಆಚರಿಸಿಕೊಳ್ಳುತ್ತಿರುವ ಮೇರು ನಿರ್ದೇಶಕನಿಗೆ ಶುಭಾಶಯ.
