ದೇವನಹಳ್ಳಿ ತಾಲೂಕಿನ ಚಿಕ್ಕನಹಳ್ಳಿ ವಿ.ಸೋಮಶೇಖರ್ ಅವರ ಹುಟ್ಟೂರು. ಅನುಕೂಲಸ್ಥ ಕುಟುಂಬದಲ್ಲಿ ಜನಿಸಿದ ಅವರಿಗೆ ಶಾಲೆ ಓದುತ್ತಿದ್ದಾಗಲೇ ಸಿನಿಮಾದೆಡೆ ವ್ಯಾಮೋಹ ಶುರುವಾಗಿತ್ತು. ಹೈಸ್ಕೂಲ್ ಓದು ಮುಗಿಯುತ್ತಿದ್ದಂತೆ ಒಂದಷ್ಟು ಹಣ ಹೊಂದಿಸಿಕೊಂಡು ಸಿನಿಮಾ ಸೇರುವ ಆಸೆಯಿಂದ ಮದರಾಸಿಗೆ ತೆರಳಿದರು. ಅಲ್ಲಿ ಸ್ಟುಡಿಯೋಗಳಿಗೆ ಅಲೆದಾಡಿದ ಅವರು ಕೊನೆಗೆ ಸುಬ್ಬಯ್ಯನಾಯ್ಡು ಅವರ ‘ಭಕ್ತಪ್ರಹ್ಲಾದ’ (1958) ಚಿತ್ರಕ್ಕೆ ಕ್ಲ್ಯಾಪ್ ಬಾಯ್ ಆದರು. ಓಹಿಲೇಶ್ವರ, ಜಗಜ್ಯೋತಿ ಬಸವೇಶ್ವರ ಚಿತ್ರಗಳ ಪುಟ್ಟ ಪಾತ್ರಗಳಲ್ಲಿ ನಟಿಸಿದರು.
ವಿ.ಸೋಮಶೇಖರ್ ಕೆಲವು ಸಮಯ ಸುಬ್ಬಯ್ಯನಾಯ್ಡು ಅವರ ನಾಟಕ ಕಂಪನಿಯ ಮ್ಯಾನೇಜರ್‌ ಆಗಿ ದುಡಿದರು. ಸುಬ್ಬಯ್ಯನಾಯ್ಡು ಅವರ ಶಿಫಾರಸಿನ ಮೆರೆಗೆ ಆರ್.ನಾಗೇಂದ್ರ ರಾಯರು ತಮ್ಮ ‘ವಿಜಯನಗರದ ವೀರಪುತ್ರ’ ಚಿತ್ರಕ್ಕೆ ಕ್ಲ್ಯಾಪ್ ಬಾಯ್ ಆಗಿ ಸೋಮಶೇಖರ್‌ರನ್ನು ನೇಮಿಸಿಕೊಂಡರು. ಆರು ವರ್ಷಗಳ ಕಾಲ ನಾಗೇಂದ್ರರಾಯರ ಸಂಸ್ಥೆಯಲ್ಲಿ ಕೆಲಸ ಮಾಡಿದ ಅವರಿಗೆ ಸಿನಿಮಾದ ವಿವಿಧ ವಿಭಾಗಗಳ ಪರಿಚಯ ಸಿಕ್ಕಿತು.
ಮುಂದೆ ರಾಜಕುಮಾರ್ ಅಭಿನಯದ ‘ಇಮ್ಮಡಿ ಪುಲಕೇಶಿ’ (1967) ಚಿತ್ರಕ್ಕೆ ವಿ.ಸೋಮಶೇಖರ್ ಸಹಾಯಕ ನಿರ್ದೇಶಕರಾದರು. ಆನಂತರ ‘ಹೇಮರೆಡ್ಡಿ ಮಲ್ಲಮ್ಮ’ ಸಿನಿಮಾ. ವೈ.ಆರ್.ಸ್ವಾಮಿ, ರವೀ, ಆರ್.ರಾಮಮೂರ್ತಿ ಅವರಲ್ಲಿ ಸಹಾಯಕರಾಗಿ ಕೆಲಸ ಮಾಡಿದ ನಂತರ ಅವರು ಸ್ವತಂತ್ರವಾಗಿ ನಿರ್ದೇಶಿಸಿದ ಮೊದಲ ಸಿನಿಮಾ ‘ಬಂಗಾರದ ಪಂಜರ’ (1974). ‘ಪ್ರೇಮದ ಕಾಣಿಕೆ, ‘ಶಂಕರ್ ಗುರು’ ಚಿತ್ರಗಳು ಅವರಿಗೆ ದೊಡ್ಡ ಹೆಸರು ತಂದುಕೊಟ್ಟವು. ರಾಜಕುಮಾರರ ಆರು ಚಿತ್ರಗಳೂ ಸೇರಿದಂತೆ ಸೋಮಶೇಖರ್ 37 ಚಿತ್ರಗಳನ್ನು ನಿರ್ದೇಶಿಸಿದ್ದಾರೆ. ‘ಗಂಡೆದೆ ಭೈರ’ (1996) ಅವರ ನಿರ್ದೇಶನದ ಕೊನೆಯ ಸಿನಿಮಾ. 2003ರ ಆಗಸ್ಟ್‌ 22ರಂದು 67ನೇ ವಯಸ್ಸಿನಲ್ಲಿ ಅವರು ಅಗಲಿದರು.
(ಮಾಹಿತಿ ಕೃಪೆ: ರುಕ್ಕೋಜಿ ಅವರ ‘ಡಾ.ರಾಜಕುಮಾರ್ ಸಮಗ್ರ ಚರಿತ್ರೆ’ ಕೃತಿ)
