60, 70ರ ದಶಕದಲ್ಲಿ ತಯಾರಾದ ಐತಿಹಾಸಿಕ, ಪೌರಾಣಿಕ, ಫ್ಯಾಂಟಸಿ ಸಿನಿಮಾಗಳನ್ನು ನೋಡಿದವರಿಗೆ ಚಿತ್ರದ ಸನ್ನಿವೇಶಗಳು ಕಣ್ಣಿಗೆ ಕಟ್ಟಿದಂತಿರುತ್ತವೆ. ಗ್ರಾಫಿಕ್ಸ್ ತಂತ್ರಜ್ಞಾನವಿಲ್ಲದ ದಿನಗಳಲ್ಲಿ ಕಲಾ ನಿರ್ದೇಶಕರ ನೈಪುಣ್ಯದಿಂದಲೇ ಇಂತಹ ದೃಶ್ಯಗಳು ಮೆರುಗು ಪಡೆಯುತ್ತಿದ್ದವು. ಅಂದಿನ ಚಿತ್ರಗಳಿಗೆ ವೈಭವ ತಂದುಕೊಟ್ಟ ಪ್ರಮುಖ ಕಲಾ ನಿರ್ದೇಶಕರ ಪೈಕಿ ಬಿ.ನಾಗರಾಜರಾವ್ ದೊಡ್ಡ ಹೆಸರು. ಹಿಂದಿ ಸೇರಿದಂತೆ ದಕ್ಷಿಣ ಭಾರತದ 500ಕ್ಕೂ ಹೆಚ್ಚು ಚಿತ್ರಗಳಿಗೆ ಅವರು ಕಲಾನಿರ್ದೇಶನ ಮಾಡಿದ್ದಾರೆ.
ಅರಮನೆ, ಬಂಗಲೆ, ದೇವಾಲಯ, ಸ್ಮಾರಕಗಳ ಮಿನಿಯೇಚರ್‍ಗಳನ್ನು ನೈಜವಾಗಿ ಕಾಣುವಂತೆ ರೂಪಿಸುತ್ತಿದ್ದ ನಾಗರಾಜರಾವ್ `ಮಿನಿಯೇಚರ್ ಸ್ಪೆಷಲಿಸ್ಟ್’ ಎಂದೇ ಹೆಸರಾಗಿದ್ದರು. ಕನ್ನಡಿಗರೇ ಆದ ಅವರ ಮೊದಲ ಕಲಾ ನಿರ್ದೇಶನದ ಕನ್ನಡ ಸಿನಿಮಾ ಕಸ್ತೂರಿ ವಿಜಯ. ಕವಿರತ್ನ ಕಾಳಿದಾಸ, ಶ್ರೀ ರೇಣುಕಾದೇವಿ ಮಹಾತ್ಮೆ, ಎಡೆಯೂರು ಸಿದ್ದಲಿಂಗೇಶ್ವರ, ಶಬರಿಮಲೆ ಸ್ವಾಮಿ ಅಯ್ಯಪ್ಪ, ಭಕ್ತ ಸಿರಿಯಾಳ… ಅವರು ಕಲಾ ನಿರ್ದೇಶನದ ಕೆಲವು ಪ್ರಮುಖ ಚಿತ್ರಗಳು. `ಕೊಲ್ಲೂರು ಶ್ರೀ ಮೂಕಾಂಬಿಕ’ (1993) ಚಿತ್ರದ ಉತ್ತಮ ಕಲಾ ನಿರ್ದೇಶನಕ್ಕಾಗಿ ಅವರಿಗೆ ರಾಜ್ಯ ಪ್ರಶಸ್ತಿ ಸಂದಿದೆ.
