ಆರಂಭದಲ್ಲಿ ಕನ್ನಡ ಸಿನಿಮಾಗಳು ತಯಾರಾಗುತ್ತಿದ್ದುದು ಮದರಾಸಿನಲ್ಲಿ. ಕನ್ನಡದ ಕಲಾವಿದರೆಲ್ಲರೂ ಅಲ್ಲಿಯೇ ಬೀಡುಬಿಟ್ಟಿದ್ದರು. ಆಗ ನಾನು ನಟಿ ಲೀಲಾವತಿ ಅವರೊಂದಿಗಿದ್ದೆ. ದೂರದ ಊರಿನಲ್ಲಿ ಆಶ್ರಯ ಕೊಟ್ಟಿದ್ದ ಲೀಲಮ್ಮನೆಂದರೆ ನನಗೆ ಅತಿಯಾದ ಅಕ್ಕರೆ. ಚಿಕ್ಕವಳಾದ ನಾನೆಂದರೆ ಲೀಲಾವತಿ ಅವರಿಗೂ ಪ್ರೀತಿ. ಲೀಲಾವತಿ ಅವರನ್ನು ನಾನು `ಅಕ್ಕ ಅಕ್ಕ’ ಎಂದೇ ಕರೆಯುತ್ತಿದ್ದುದು. ಕೆಲವೊಮ್ಮೆ ಕ್ಯಾಮರಾ ಎದುರೂ `ಅಕ್ಕ’ ಎಂದು ಕರೆದು ನಿರ್ದೇಶಕರಿಂದ ಬಯ್ಯಿಸಿಕೊಳ್ಳುತ್ತಿದ್ದುದೂ ಇತ್ತು!
ಅದೊಮ್ಮೆ ಮದರಾಸಿನ ಸ್ಟುಡಿಯೋದಲ್ಲಿ `ವೀರಕೇಸರಿ’ ಚಿತ್ರದ ಸನ್ನಿವೇಶವೊಂದನ್ನು ಚಿತ್ರಿಸಲಾಗುತ್ತಿತ್ತು. ಚಿತ್ರದಲ್ಲಿ ಲೀಲಾವತಿ ಅಕ್ಕ ರಾಜಕುಮಾರಿ. ಸಖಿಯಾಗಿ ನಾನು ನಟಿಸುತ್ತಿದ್ದೆ. ಸನ್ನಿವೇಶವೊಂದರಲ್ಲಿ ನನ್ನ ಕೆನ್ನೆಗೆ ಲೀಲಾವತಿ ಅಕ್ಕ ಹೊಡೆಯಬೇಕಿತ್ತು. ಆಕಸ್ಮಾತಾಗಿ ಏಟು ಸ್ವಲ್ಪ ಜೋರಾಗಿಯೇ ಬಿತ್ತು. ಸದಾ `ಅಕ್ಕ’ ಎನ್ನುತ್ತಿದ್ದ ನಾನು ಆಗ `ಅಮ್ಮ’ ಎಂದುಬಿಟ್ಟೆ! ಮರುಕ್ಷಣವೇ ಏನೋ ನೆನಪಿಸಿಕೊಂಡಂತೆ ನಾನು, ಲೀಲಾವತಿ ಅಕ್ಕ ನಗತೊಡಗಿದೆವು. ಇದರ ಹಿನ್ನೆಲೆ ಅರಿಯದ ಸೆಟ್ನವರು ಕಕ್ಕಾಬಿಕ್ಕಿ!
