ಈಗ ಸಿನಿಮಾ, ಕಿರುತೆರೆ ಚಿತ್ರೀಕರಣಗಳಲ್ಲಿ ಜಿಮ್ಮೀ ಜಿಬ್ ಸೇರಿದಂತೆ ಆಧುನಿಕ ಪರಿಕರಗಳಿಂದ ಮೂವಿಂಗ್ -ಏರಿಯಲ್ ಶಾಟ್‌ಗಳನ್ನು ಚಿತ್ರಿಸುತ್ತಾರೆ. ಸೌಲಭ್ಯಗಳಿಲ್ಲದ ಆಗ ಏನೇನೋ ಐಡಿಯಾಗಳನ್ನು ಮಾಡಬೇಕಿತ್ತು. ಇದು ಬೆಂಗಳೂರಿನ ಓಪನ್ ಏರ್ ಥಿಯೇಟರ್ ನಲ್ಲಿ ನಡೆದ ‘ಪ್ರೇಮಾಯಣ’ (1978) ಶೂಟಿಂಗ್ ಸಂದರ್ಭ. ಕಾರಿನ ಡೋರ್‌ನ ಎರಡೂ ಬದಿ ಕಾಲು ಹಾಕಿ ಕ್ಯಾಮೆರಾ ಹಿಡಿದಿರೋದು ಛಾಯಾಗ್ರಾಹಕ ಯು.ಎಂ.ಎನ್.ಷರೀಫ್. ಅವರನ್ನು ಒಳಗಿನಿಂದ ಸಹಾಯಕರೊಬ್ಬರು ಬಳಸಿ ಹಿಡಿದಿದ್ದರೆ, ಮುಂದೊಬ್ಬರು ಸೂಚನೆ ನೀಡುತ್ತಿದ್ದಾರೆ.
ಛಾಯಾಗ್ರಾಹಕ ಷರೀಫ್ ಚಿತ್ರದುರ್ಗದವರು. ಪುಣೆಯ ಫಿಲಂ ಮತ್ತು ಟೆಲಿವಿಷನ್ ಸಂಸ್ಥೆಯ ಡಿಪ್ಲೊಮಾ ಪದವೀಧರ. ಆ ಅವಧಿಯಲ್ಲಿ ಹಿಂದಿ ನಟಿ ಜಯಾ ಬಾಧುರಿ ಇವರ ಕ್ಲಾಸ್‌ಮೇಟ್ ಆಗಿದ್ದರಂತೆ. ಷರೀಫ್ ಛಾಯಾಗ್ರಹಣ ಮಾಡಿದ ಮೊದಲ ಸಿನಿಮಾ ಬಿ.ವಿ.ಕಾರಂತ ಮತ್ತು ಗಿರೀಶ್ ಕಾರ್ನಾಡ್ ನಿರ್ದೇಶನದ ‘ವಂಶವೃಕ್ಷ’ (1972). ಕೆ.ಎಂ.ಶಂಕರಪ್ಪ ನಿರ್ದೇಶನದ ‘ಮಾಡಿ ಮಡಿದವರು’ (1974) ಸಿನಿಮಾದ ಅತ್ಯುತ್ತಮ ಛಾಯಾಗ್ರಹಣಕ್ಕಾಗಿ ಷರೀಫ್ ಅವರಿಗೆ ರಾಜ್ಯ ಪ್ರಶಸ್ತಿ ಲಭಿಸಿದೆ. ಖ್ಯಾತ ಛಾಯಾಗ್ರಾಹಕ ಎಸ್.ರಾಮಚಂದ್ರ ಅವರು ಷರೀಫರಿಗೆ ಸಹಾಯಕರಾಗಿ ವೃತ್ತಿ ಜೀವನ ಆರಂಭಿಸಿದ್ದು. ಷರೀಫ್ ಹಲವು ಸಾಕ್ಷ್ಯಚಿತ್ರಗಳಿಗೆ ಛಾಯಾಗ್ರಹಣ ಮಾಡಿದ್ದಾರೆ.
(ಫೋಟೊ: ಪ್ರಗತಿ ಅಶ್ವತ್ಥ ನಾರಾಯಣ)
