(ಬರಹ – ಫೋಟೋಗಳು: ಪ್ರಗತಿ ಅಶ್ವತ್ಥ ನಾರಾಯಣ)
ಚಿತ್ರವೊಂದು ರೂಪುಗೊಳ್ಳಬೇಕಾದರೆ ಮುಖ್ಯಭೂಮಿಕೆಯ ನಟ – ನಟಿಯರೊಂದಿಗೆ ಪೋಷಕ ಪಾತ್ರಗಳೂ ಅತ್ಯವಶ್ಯ. ಪೋಷಕ ಪಾತ್ರಗಳಲ್ಲಿ ಕೆಲವೊಮ್ಮೆ ಪುಟ್ಟ ಅವಧಿಯಲ್ಲಿ ಬಂದುಹೋಗುವ ಪಾತ್ರಗಳಾದರೆ, ಮತ್ತೆ ಕೆಲವು ಬಾರಿ ಚಿತ್ರದುದ್ದಕ್ಕೂ ಪಾತ್ರಧಾರಿಗಳು ಕಾಣಿಸಿಕೊಳ್ಳುವುದಿದೆ. ನಾಯಕ – ನಾಯಕಿಯ ಸ್ನೇಹಿತರಾಗಿ, ಸಂಬಂಧಿಯಾಗಿ, ಹಿತೈಷಿಗಳಾಗಿ, ಊರಿನ ಯಜಮಾನರಾಗಿ, ಕಚೇರಿಯಲ್ಲಿನ ಸಹ ಸಿಬ್ಬಂದಿ, ಖಳರ ಆಪ್ತರಾಗಿ… ಹಲವು ಬಾರಿ ಚಿತ್ರಕಥೆಗೆ ತಿರುವು ನೀಡುವುದೇ ಪೋಷಕ ಪಾತ್ರಗಳು. ದಶಕಗಳ ಹಿಂದಿನ ಕೌಟುಂಬಿಕ ಚಿತ್ರಗಳಲ್ಲಿ ಹತ್ತಾರು ಪೋಷಕ ಪಾತ್ರಗಳಿರುತ್ತಿದ್ದವು. ಕೂಡುಕುಟುಂಬದ ಕಾನ್ಸೆಪ್ಟ್ ಇಡೀ ಸಿನಿಮಾದಲ್ಲೂ ಸಿಗುತ್ತಿತ್ತು!
ದಶಕಗಳಿಂದೀಚೆಗೆ ನಾಯಕಪ್ರಧಾನ ಕತೆಗಳಿಂದಾಗಿ ಪೋಷಕ ಪಾತ್ರಗಳಿಗೆ ಸಿಗುವ ಪ್ರಾಧಾನ್ಯತೆ ಗೌಣವಾಗಿದೆ. 70 ದಶಕದವರೆಗೂ ಕನ್ನಡ ಚಿತ್ರರಂಗ ಮದರಾಸಿನಲ್ಲೇ ನೆಲೆಯೂರಿತ್ತು. ಆಗಿನ ಕನ್ನಡ ಚಿತ್ರರಂಗದಲ್ಲಿನ ಪೋಷಕ ಕಲಾವಿದರ ಕೊಡುಗೆಯನ್ನು ನೆನೆಯಲೇಬೇಕು. ಕಡಿಮೆ ಸಂಖ್ಯೆಯ ಚಿತ್ರಗಳು ತಯಾರಾಗುತ್ತಿದ್ದ ಅಂದಿನ ದಿನಗಳಲ್ಲಿ ತಮಗೆ ಸಿಗುತ್ತಿದ್ದ ಸಣ್ಣ ಪುಟ್ಟ ಪಾತ್ರಗಳಲ್ಲೇ ತೃಪ್ತಿ ಪಟ್ಟು, ಸಿಗುತ್ತಿದ್ದ ತೀರ ಕಡಿಮೆ ಸಂಭಾವನೆಯಲ್ಲೇ ಜೀವನ ಸಾಗಿಸಿದರು. ನಟನಾ ವೃತ್ತಿಯಲ್ಲಿನ ಅವರಿಗಿದ್ದ ಪ್ರೀತಿ, ನಿಷ್ಠೆ ಎಲ್ಲಾ ಸಂಕಷ್ಟಗಳನ್ನು ಮರೆಸುತ್ತಿತ್ತು. ದೂರದೂರು ಮದರಾಸಿನಲ್ಲಿ ಪರಸ್ಪರ ಸಹಕಾರದಿಂದ ಕುಟುಂಬ ನಿರ್ವಹಣೆ ಮಾಡುತ್ತಿದ್ದರು. ನಾನು ಸೆರೆಹಿಡಿದ, ನನ್ನ ಸಂಗ್ರಹದಲ್ಲಿನ ಪುರುಷ ಪೋಷಕ ಕಲಾವಿದರ ಫೋಟೋಗಳನ್ನು ಇಲ್ಲಿ ಹಂಚಿಕೊಂಡಿದ್ದೇನೆ.