- ತುಳು ಚಲನಚಿತ್ರ ನಿರ್ಮಾಣ ಮತ್ತು ನಿರ್ದೇಶನದಲ್ಲಿ ಮೊದಲು ತೊಡಗಿಸಿಕೊಂಡವರು ಎಸ್.ಆರ್.ರಾಜನ್. ಅವರು ನಿರ್ಮಿಸಿ, ನಿರ್ದೇಶಿಸಿದ ಮೊದಲ ತುಳು ಸಿನಿಮಾ ‘ಎನ್ನತಂಗಡಿ’ 1971ರ ಫೆಬ್ರವರಿ 19ರಂದು ಬಿಡುಗಡೆಯಾಯ್ತು.
- ‘ಎನ್ನತಂಗಡಿ’ ಚಿತ್ರಕ್ಕೆ ಮುನ್ನವೇ ಆರೂರು ಪಟ್ಟಾಭಿ ಅವರು ‘ದಾರೆದ ಬುಡೆದಿ’ ಸಿನಿಮಾ ನಿರ್ದೇಶನಕ್ಕೆ ತೊಡಗಿದ್ದರು. ಆದರೆ ಮೊದಲು ‘ಎನ್ನತಂಗಡಿ’ ಬಿಡುಗಡೆಯಾಯ್ತು. ‘ದಾರೆದ ಬುಡೆದಿ’ ಚಿತ್ರದೊಂದಿಗೆ ತುಳು ರಂಗಭೂಮಿಯಲ್ಲಿ ಖ್ಯಾತನಾಮರಾಗಿದ್ದ ಕೆ.ಎನ್.ಟೈಲರ್ ಬೆಳ್ಳಿತೆರೆ ಪ್ರವೇಶಿಸಿದರು.
- ರಾಜ್ಯ ಪ್ರಶಸ್ತಿ ಪಡೆದ ಮೊದಲ ತುಳು ಸಿನಿಮಾ `ಬಿಸತ್ತಿ ಬಾಬು’ (1972). ಕೆ.ಎನ್.ಟೈಲರ್ ಚಿತ್ರಕಥೆ, ಸಂಭಾ‍ಷಣೆ, ಗೀತೆಗಳನ್ನು ರಚಿಸಿ ಚಿತ್ರದಲ್ಲಿ ನಟಿಸಿದ್ದರು. ಆರೂರು ಪಟ್ಟಾಭಿ ನಿರ್ದೇಶನದ ಸಿನಿಮಾ ರಾಜ್ಯ ಸರ್ಕಾರದಿಂದ ತೃತೀಯ ಅತ್ಯುತ್ತಮ ಚಿತ್ರ ಪ್ರಶಸ್ತಿ ಪಡೆದು ತುಳು ಸಿನಿಮಾರಂಗದಲ್ಲಿ ಹೊಸ ಅಧ್ಯಾಯ ಬರೆಯಿತು.
- ಮೊದಲ ಚಾರಿತ್ರಿಕ ತುಳು ಸಿನಿಮಾ `ಕೋಟಿ ಚೆನ್ನಯ’ 1973, ಮಾರ್ಚ್‌ 15ರಂದು ತೆರೆಕಂಡಿತು. ತುಳುನಾಡಿನ ವೀರಪುರುಷರ ಕತೆಯ ಈ ಚಿತ್ರದ ನಿರ್ದೇಶಕರು ವಿಶುಕುಮಾರ್. ಈ ಸಿನಿಮಾ 125 ದಿನಗಳ ದಾಖಲೆ ಪ್ರದರ್ಶನ ಕಂಡಿತು.
- ಜಯಮಾಲಾ ನಟಿಸಿದ ಮೊದಲ ತುಳು ಸಿನಿಮಾ `ಕಾಸ್ ದಾಯೆ ಕಂಡಿನೆ’. 1974ರಲ್ಲಿ ತೆರೆಕಂಡ ‘ಏರ್‌ ಮಲ್ತಿನ ತಪ್ಪು’ ಚಿತ್ರದೊಂದಿಗೆ ಕೆ.ಎನ್.ಟೈಲರ್ ನಿರ್ದೇಶಕರಾದರು.
- ಮೊದಲ ತುಳು ಕಲರ್ ಸಿನಿಮಾ ಆರೂರು ಪಟ್ಟಾಭಿ ನಿರ್ದೇಶನದ `ಕರಿಯಾಣಿ ಕಟ್ಟಂದಿ ಕಂಡನೆ’ (1978). ಆರೂರು ಪಟ್ಟಾಭಿ ನಿರ್ದೇಶನದ ಕೊನೆಯ ಸಿನಿಮಾ ‘ಸತ್ಯ ಓಲುಂಡು’ (1990). ಅತಿ ಹೆಚ್ಚು ಹತ್ತು ತುಳು ಚಿತ್ರ ನಿರ್ದೇಶಿಸಿದ ಹೆಗ್ಗಳಿಕೆ ಆರೂರು ಪಟ್ಟಾಭಿ ಅವರಿಗೆ ಸಲ್ಲುತ್ತದೆ.
- ಡಾ.ರಿಚರ್ಡ್ ಕ್ಯಾಸ್ಟಲಿನೋ ನಿರ್ಮಾಣ, ನಿರ್ದೇಶನದ `ಬಂಗಾರ್ ಪಟ್ಲೇರ್’ ಮೊತ್ತಮೊದಲ ಸಿನಿಮಾಸ್ಕೋಪ್‌ ತುಳು ಸಿನಿಮಾ. ಇದು ಅತ್ಯಂತ ಹೆಚ್ಚು ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಪ್ರಶಸ್ತಿ ಪಡೆದ ಚಿತ್ರವೂ ಹೌದು. ಮುಂದೆ ರಿಚರ್ಡ್ ಕ್ಯಾಸ್ಟಲಿನೋ ‘ಸೆಪ್ಟೆಂಬರ್‌ 8’ ಚಿತ್ರವನ್ನು 24 ಗಂಟೆಗಳಲ್ಲಿ ಚಿತ್ರಿಸಿ ದಾಖಲೆ ಮಾಡಿದರು. ಈ ಚಿತ್ರದಲ್ಲಿ ಜ್ಞಾನಪೀಠ ಪುರಸ್ಕೃತ ಸಾಹಿತಿ ಶಿವರಾಮ ಕಾರಂತರು ನಟಿಸಿದ್ದು ವಿಶೇಷ.
- ಕೋಡ್ಲು ರಾಮಕೃಷ್ಣ ನಿರ್ದೇಶನದ ‘ತುಡರ್‌’ ರಾಜ್ಯಸರ್ಕಾರದ 2000-2001ನೇ ಸಾಲಿನ ಅತ್ಯುತ್ತಮ ಪ್ರಾದೇಶಿಕ ಚಿತ್ರ ಪ್ರಶಸ್ತಿಗೆ ಪಾತ್ರವಾಯ್ತು.
- ಅತ್ಯುತ್ತಮ ಪ್ರಾದೇಷಿಕ ಸಿನಿಮಾ ರಾಷ್ಟ್ರಪ್ರಶಸ್ತಿ ಪಡೆದ ತುಳು ಸಿನಿಮಾಗಳು – ಬಂಗಾರ್ ಪಟ್ಲೇರ್ (1993), ಕೋಟಿ ಚೆನ್ನಯ (2007), ಗಗ್ಗರ (2008), ಮದಿಪು (2016), ಪಡ್ಡಾಯಿ (2017)
