(ಬರಹ: ಮಲ್ಲಿಕಾರ್ಜುನ ಮೇಟಿ)
ಮಾಯಾವರಂ ಕೃಷ್ಣಸ್ವಾಮಿ ತ್ಯಾಗರಾಜ ಭಾಗವತರ್ ತಮಿಳು ಚಿತ್ರರಂಗದಲ್ಲಿ ‘ಎಂ.ಕೆ.ಟಿ’ ಎಂದೇ ಹೆಸರಾದವರು. ತಮಿಳು ಚಿತ್ರರಂಗದ ಮೊದಲ ಸೂಪರ್ಸ್ಟಾರ್! ಶಾಸ್ತ್ರೀಯ ಗಾಯನದಲ್ಲಿ ಪರಿಣತಿ ಹೊಂದಿದ್ದ ಅವರು ಮೊದಲ ಬಣ್ಣ ಹಚ್ಚಿದ್ದು ರಂಗಭೂಮಿಯಲ್ಲಿ. ‘ಪವಲಕ್ಕೊಡಿ’ (1934) ಚಿತ್ರದೊಂದಿಗೆ ಬೆಳ್ಳಿತೆರೆ ಪ್ರವೇಶಿಸಿದ ಅವರು ಚೊಚ್ಚಲ ಪ್ರಯತ್ನದಲ್ಲೇ ದೊಡ್ಡ ಗೆಲುವು ಕಂಡರು. 1934ರಿಂದ 1959ರ ಅವಧಿಯಲ್ಲಿ ತ್ಯಾಗರಾಜ ಭಾಗವತರ್ ಹದಿನಾಲ್ಕು ಚಿತ್ರಗಳಲ್ಲಿ ನಟಿಸಿದ್ದಾರೆ. ಇವುಗಳ ಪೈಕಿ ಹತ್ತು ಚಿತ್ರಗಳು ಬಹುದೊಡ್ಡ ಯಶಸ್ಸು ದಾಖಲಿಸಿದವು. ಸತ್ಯಶೀಲನ್ (ದ್ವಿಪಾತ್ರ), ಚಿಂತಾಮಣಿ, ಅಂಬಿಕಾಪತಿ, ತಿರುನೀಲಕಂಠರ್‌, ಅಶೋಕ್ ಕುಮಾರ್, ಶಿವಕವಿ… ಅವರ ಕೆಲವು ಪ್ರಮುಖ ಚಿತ್ರಗಳು.
1944ರಲ್ಲಿ ತೆರೆಕಂಡ ಅವರ ‘ಹರಿದಾಸ್‌’ ಸಿನಿಮಾ ಮದರಾಸಿನ ಬ್ರಾಡ್‌ವೇ ಥಿಯೇಟರ್‌ನಲ್ಲಿ ನಿರಂತರವಾಗಿ ಎರಡೂವರ್ಷ ಪ್ರದರ್ಶನ ಕಂಡಿದ್ದೊಂದು ದಾಖಲೆ. ಸತತ ಗೆಲುವಿನ ಹಿನ್ನೆಲೆಯಲ್ಲಿ ತ್ಯಾಗರಾಜ ಭಾಗವತರ್ ಸಂಭಾವನೆ ಬಹು ದುಬಾರಿಯಾಗಿತ್ತು. ಯಶಸ್ಸಿನ ಉತ್ತುಂಗದಲ್ಲಿದ್ದಾಗ ದುರದೃಷ್ಟವತಾಶ್ ತ್ಯಾಗರಾಜ ಭಾಗವತರ್ ಕೊಲೆ ಪ್ರಕರಣವೊಂದರಲ್ಲಿ ಸಿಲುಕಿದರು. ತಮಿಳು ಸಿನಿಮಾ ಪತ್ರಕರ್ತ ಲಕ್ಷ್ಮೀಕಾಂತನ್‌ ಕೊಲೆ ಪ್ರಕರಣದ ಆರೋಪಿಯಾಗಿ ಭಾಗವತರ್ ಮೂರು ವರ್ಷಗಳ ಕಾಲ ಜೈಲು ವಾಸ ಅನುಭವಿಸಬೇಕಾಯ್ತು.
ತ್ಯಾಗರಾಜ ಭಾಗವತರ್ ಜೈಲು ಸೇರಿದಾಗ ಅವರಿಗೆ ಬರುತ್ತಿದ್ದ ಅವಕಾಶಗಳು ಕನ್ನಡಿಗ ಹೊನ್ನಪ್ಪ ಭಾಗವತರ್ ಅವರ ಪಾಲಾದವು. ಆ ಸಂದರ್ಭದಲ್ಲಿ ಹೊನ್ನಪ್ಪ ಭಾಗವತರ್ ಅವರು ತ್ಯಾಗರಾಜ ಭಾಗವತರನ್ನು ಜೈಲಿನಲ್ಲಿ ಕಂಡು ಅವರ ಒಪ್ಪಿಗೆ ಪಡೆದು ಮುಂದುವರೆಯುತ್ತಿದ್ದರು. ಕೊಲೆ ಆರೋಪದಲ್ಲಿ ನಿರ್ದೋಷಿ ಎಂದು ಬಿಡುಗಡೆಯಾಗಿ ಹೊರಬಂದ ನಂತರ ತ್ಯಾಗರಾಜ ಭಾಗವತರ್ ಅವರಿಗೆ ಮೊದಲಿನಂತೆ ಅವಕಾಶಗಳು ಸಿಗಲಿಲ್ಲ. ಹಿಂದಿದ್ದ ಜನಪ್ರಿಯತೆ ಕುಂದಿತ್ತು. ನಂತರದ ದಿನಗಳನ್ನು ಕಷ್ಟದಲ್ಲಿ ಕಳೆದರೂ ತಮಿಳು ಚಿತ್ರರಂಗದಲ್ಲಿ ಚರಿತ್ರಾರ್ಹವಾಗಿ ಉಳಿದಿದ್ದಾರೆ.
